Shkruan Avni Selmani

Në Prishtinë, më 26 dhe 27 shtator, Ansambli Kombëtar i Këngëve dhe Valleve “Shota” shënon 50-vjetorin e themelimit me një program madhështor jubilar. Në këtë festë marren pjesë grupe simotra nga të gjitha trojet shqiptare, duke sjellë një atmosferë të ngrohtë mbarëkombëtare. Në skenë ngjiten breza artistësh që i kanë dhënë emër ansamblit ndër vite, ndërsa publiku përjeton një program të pasur me këngë, valle dhe interpretime që përmbledhin historinë dhe shpirtin e “Shotës”.

Ngjarja kulmoi me gala-koncertin në Pallatin “1 Tetori”, ku “Shota” u shfaq në formën e saj më të mirë – me ekzekutim të përkryer, veshje të pastra tradicionale dhe lojë skenike plot energji. Vullneti dhe dashuria për artin e traditën e kanë mbajtur këtë ansambël gjallë për pesë dekada, përmes qindra artistëve që kanë lënë gjurmë të pashlyeshme në historinë e tij.

Programi u hap me këngën “Ma gëzofsh 50-vjetorin”, me tekst të Ilir Shaqirit dhe përpunim të Ylber Asllanajt, shoqëruar me vallen e Shalës së Bajgorës në koreografi të Haki Mulliqit. Në skenë morën pjesë edhe grupe nga Shqipëria, Maqedonia, Mali i Zi dhe diaspora, duke i dhënë ngjarjes karakter mbarëkombëtar dhe një atmosferë të ngrohtë bashkimi kulturor.

Në kuadër të festimeve u hap edhe ekspozita “50 vite në 50 fotografi”, e cila përmbledhte momente dhe sete artistike të realizuara posaçërisht për këtë jubile nga fotografi Avni Selmani. Ekspozita paraqiti përmes imazhit rrugëtimin e gjatë të ansamblit dhe figurat që e kanë bërë “Shotën” simbol të identitetit artistik të Kosovës.

Ky jubile u organizua me kujdes dhe përkushtim të madh nën drejtimin e Shefqet Gjocajt, drejtor i Ansamblit Kombëtar të Këngëve dhe Valleve “Shota”, i cili me vizionin dhe përvojën e tij arriti ta kthejë këtë përvjetor në një ngjarje të denjë për historinë e ansamblit dhe për vetë artin skenik shqiptar.

Programi u përmbyll me koreografinë e Xhemali Berishës, që u prit me ovacione të gjata nga publiku. Kështu u kurorëzua një ngjarje që, përveç festës, ishte edhe një homazh për brezat që themeluan dhe mbajtën gjallë emrin “Shota”.

Fotografitë zyrtare dhe dokumentimi vizual i ngjarjes u realizuan nga Avni Selmani.